Dear Netizen +62,

Aye geregetan banget sama ulah lu pade. Mangkin ke sini aye perhatiin mangkin jadi aje. Mangkin semena-mena sama nyang namanye micin. Setiap ada kejadian nyang dianggap salah, kagak semenggah, miring, edan, tabu, serta melenceng dari norma pasti pade nyalahin micin.

Coba deh kite lihat. Ada anak muda baru putus sama pacarnye terus curhat sampe nangis-nangis lebay di medsos, dibilang mabok micin. Padahal pan die lagi dimabok cinta, kenape jadi micin nyang disalahin? Harusnye nyang disalahin ya orangtuanye dong.

Kenape ntu anak pas putus cinta dan patah hati kagak langsung diajak ke rumah makan Padang? Biar die bisa ketemu sama hati nyang laen macam rendang hati, gulai hati, atau sambel goreng hati. Banyak kannn.

Terus kalo ada anak muda nyang ngomongnye kasar juga dipanggil generasi micin. Padahal kan nyang salah mulutnye. Kenape micin lagi nyang jadi sasaran?

Faktanye, micin itu justru memanjakan semua organ dalem mulut, terutama lidah. Mulut nyang ketempelan micin pasti kagak bakalan bisa ngomong kasar karena udah terlalu disibukkan dengan aktivitas mengunyah dan menelan.

Jadi, harusnye nyang suka ngomong kasar tuh kagak pantes dipanggil generasi micin, kalo kurang micin sih iye.

Terus juga kalo liat anak kecil di bawah umur tukang dandan menor pasti pade ngatain nih anak kebanyakan makan micin. Ye padahal ape hubungannye coba hobi makan micin sama hobi dandan?

Ape ada penelitian valid nyang bilang kalo konsumsi micin berpengaruh kuat terhadap keinginan orang untuk dandan? Atau kelean mau bilang kalo nih anak otaknya kopong gegara kebanyakan makan micin jadinye dari kecil dah genit dandan menor biar dikata cakep?

Yaelahhhhh, kalo gitu lu nyang pade hobi ngedit poto buat dijadiin PP juga bisa dong disebut kebanyakan makan micin. Pan sama-sama pingin terlihat lebih cakep.

Belon lagi kalo ada anak kecil pacaran. Lagi-lagi micin ikutan terseret kebawa-bawa disalahin. Micin dianggap bawa pengaruh negatif terhadap perkembangan otak dan perilaku anak sampe tuh anak bukannye belajar baek-baek di sekolah malah pacaran.

Masih piyik manggilnye dah mamah-papih atau abi-umi macem orang nyang sok ta’aruf padahal pacaran, eh…

Pas ada artis milenial mabok, micin pun gak lepas dari sorotan. Biar tuh bocah mabok karena miras, narkoba, lem, ataupun jengkol, pasti ada aje netizen nyang ngatain mereka mabok micin. Bayangan, betapa apesnya jadi micin. Maka panteslah kalo micin suatu saat bawain lagunye Seventeen. “Selalu Salah” gitu loh.

Ya ape siiih salah micin? Micin pan cuman bikin makanan kite jadi enak. Gak pernah tuh aye liat ada micin nyontohin pacaran. Ade juga tuh sinetron, youtuber, pelem, dan iklan-iklan di tipi nyang nyontohin orang pacaran, bukan micin.

Nyang lebih seru, ledekan mabok atau kebanyakan makan micin belakangan bukan cuman dialamatkan ke bocah-bocah piyik milenial aja. Orang dewasa nyang gontok-gontokan karena beda pilihan politik pun kagak sedikit nyang mulai menggunakan alasan kemicinan dalam setiap debat dan bully-nye ke lawan politik.

Pokoknye kalo ketemu orang nyang beda pilihan politik, kite ngerasa sah-sah aje manggil tuh orang kebanyakan makan micin. Meski kenyataannye kedua belah pihak sama-sama doyan indomie goreng. Dih, maluuu.

Padahal sejatinye bukan micin nyang bikin otak kite kopong sampe berantem gegara beda pilihan politik, tapi bisa jadi emang otak kite ada, cuma mati pas ketemu nyang punya pilihan beda.

Makanye, daripade berantem-beranteman, mending kite berantem beneran di warung Padang. Pesen menu otak dan telor dadar buat nambah nutrisi daleman batok kelapa, eh… kepala. Hajar dah tuh bareng nasi pulen, daon singkong, sambel ijo dan limpahan kuah raya-raya. Merdeka!

Nah, nyang terbaru malah lebih parah lagi. Ada anggota DPR (inisialnye, Arteria Dahlan) nyang baru dilantik, dinobatkan sebagai duta micin nasional versi netizen. Ini terjadi lantaran tuh orang pas tampil debat di tipi bersikap kurang ajar sama lawan bicaranye (inisialnye, Prof. Emil Salim) nyang lebih sepuh dan tentu saja lebih keliatan sumbangsihnye buat negara dibanding die.

Ibarat kate, die baru jadi zygot, si prof dah jadi menteri. Kok bisa-bisanye malah ngerasa lebih pinter, ngomong pake ngebentak-bentak sambil nunjuk-nunjuk segala ke orang tua nyang jadi lawan bicaranye. Lagaknye sombong kayak kucing aye pas abis di-grooming tapi ringsek pas kepeleset kecebur comberan.

Jadinye netizen ngedit foto orang berinisial Arteri Dahlan jadi megang kemasan salah satu merek MSG sambil tangan satunye megang sendok, nunjuk ke arah kamera. Jelas aye kagak terima. Ini penghinaan besar bagi micin. Ape salah micin sampe harus diperlakukan serendah itu?!

Udeh cukup buruk tuh micin di-“black mbee”-in sebagai akibat dari kenakalan remaja, kenape sekarang ditambah lagi bebannye jadi ikon kebebalan sikap dan pikiran anggota dewan nyang mulia?! Sungguh terlalu!

Jangan begitulah kelean sama micin. Ape kelean kagak takut kalo si micin nanti jadinye ngambek? Lambaikan bendera putih karena kagak kuat terus disalah-salahin sehingga menghilang dari pasaran? Nanti ape kabar nasib penggemar mie ayam pinggir jalan? Mosok ntar mie-nye cuman berase bawang putih, garem, ame lada doang?

 

Belon lagi tukang kaefsi-kaefsian. Ntu tepung bumbu kalo kagak dicampur micin bakalan ambyarrr, eh… hambarrr rasanye. Kayak ade nyang ngaku sayang tapi cuman berani ngajak jalan, bukan lamaran.

Terus kang bakso juga nanti kesian. Bakal banyak kehilangan penggemar kalo micin kagak lagi berperan bikin orang ketagihan kuah bakso. Sungguh mimpi buruk bagi perekonomian mikro kalo ibu-ibu dah milih bikin jajanan sendiri di rumah daripade beli di abang-abang. Wong rasanye samaaaa, kagak cihuy dan nagih lagi.

Dan tentu saja menghilangnye micin bakal jadi pukulan telak bagi pengusaha dan penggemar mie instan. Emangnye kelean mau kalo mie kelean cuman dibumbuin bubuk cabe, garem, sama daon bawang kering? Gak, kannn?

Begitu banyak jasa besar micin bagi kelangsungan jajan, eh… pangan kite. Mangkanye, mumpung micin masih baek sama kite, kite juga kudu baek dan sayang sama die. Jangan ape-ape maen nyalahin aje. Justru kite nyang harus lestariin keberadaannye. Save micin lah, pokoknye!