Dino-dino iki, Lur, lagi rame wong ngomong politik. Ancene saiki usum coblosan. Mengko, 27 Juni 2018, Jatim arep onok pilihan gubernur karo pilihan wali kota/bupati nang 18 daerah.

Akeh sing duwe jago. Akeh sing yakin jagone top, tapi yo akeh sing males milih. Mergo wis apatis, uwong-uwong nganggep angel golek kepala daerah sing jujur, resik, karo apik.

Asline onok gak seh pemimpin sing jujur, resik, karo apik iku?

Jawabane Lur, asline yo onok. Tapi, yo ojo nganggep onok pemimpin sing bener-bener koyok nabi. Sing resik nemen, jujur, karo ancene 100 persen dedikasine nggo rakyat.

Lho terus yok opo lek ngunu? Percuma lakan onok pilihan? Sabar Cak, sabar.

Peno-peno kabeh ngerti lek Indonesia iku nganut negoro demokrasi langsung. Artine, pemimpine dipilih langsung rakyate lewat pemilu. Sing dadi masalah Cak, demokrasi koyok ngunu iku larang.

Digawe itung-itungan ae yo, Cak. Arep maju gubernur iku mesthi kudu butuh tiket seko partai. Syarate minimal kudu didukung 20 persen kursi nang DPRD Jatim utowo 20 kursi.

Nah, biasane, golek 20 kursi iku gak gampang. Kudu ngelobi paling gak loro–telu parpol. Oleh dukungan parpol iku angel. Selain kudu duwe modal popularitas, elektabilitas, lan basis massa duwur, biasane tetep secara gak formal nggo nyumbang parpol.

Opo maneh lek calone seko njobo parpol.

Mergo gak oleh duwe badan usaha, parpol biasane ngandalno “mahar politik” pilkada. Tujuane jelas, nggo amunisi pas pemilu legislatif. Lek kelase pilgub, krungu-krungune wis tembus eM-eM-an (miliaran) nggo oleh rekomendasi dukungan.

Saiki garek ngepingno ae pirang partai sing dibutuhno. Iku wis butuh duwek gak sithik.

Onok alternatif maneh lek gak pengen lewat partai. Yaiku, jalur independen. Tapi iki luweh repot maneh. Kudu oleh dukungan 6,5 persen seko DPT. Nang Jawa Timur, DPT ne sampe 30 juta. Dadi yo kiro-kiro butuh sekitar 1,95 juta KTP dukungan.

Saiki nggo fotokopi 2 juta KTP ae lho wis piro duwike? Durung mbayari sing nggolekno KTP karo tetek bengek liyane. Lek global tibone sak KTP regone Rp 10 ewu, opo wis gak Rp 20 miliar dewe?

Iku ngunu isih durung onok resiko gampang dijegal seko KTP. Mesthi luwih larang lewat partai.

Iku mau sek seko pendaftaran, saiki nggo nyiapno saksi nang TPS. Nang Pilgub Jatim dewe onok 68 ewu TPS. Roto-roto sak TPS onok loro uwong. Sak uwong pasarane dibayar Rp 150 ewu–Rp 250 ewu. Gawe ae lah Rp 200 ewu. Wis dipengno 68 ewu. Ping rong uwong. Wis sekitar Rp 28 miliar dewe.

Iku sek saksi, durung koordinator saksi. Durung koordinatore koordinator saksi. Durung pelatihan saksi. Isok-isok seko saksi ae butuh duit Rp 40 miliar.

Maringunu, operasional kampanye. Komponene iku akeh. Pertama, nggo tim sukses ring I. Terus kanggo koordinator daerah tingkat kota/kabupaten. Terus kanggo relawan-relawan. Saiki mosok onok tim sukses utowo relawan gelem kerjo tapi gak dibayar. Iki tenogo, Rek.

Kebutuhan relawan iku isok podo karo jumlah TPS, yaiku 70 ewuan. Elek-elekan dibayar sak ulan Rp 500 ewu ae lah sak relawan, opo wis gak Rp 35 miliar dewe. Iku sak ulan. Lek kerjo petang ulang, kan wis Rp 140 miliar dewe.

Nyatane, onok tim sukses iku bayarane iso Rp 10 juta sak ulan.

Iki ngunu isih durung ngomong soal nyetak banner, spanduk, brosur, kaos, lan biaya iklan. Total isok-isok Rp 50 miliar dewe. Durung kanggo biaya tak terduga koyok operasional pasangan calon. Terus biaya gae warga sing marani pasangan calon.

Variabel tambahan biaya sing lumayan akeh yo seko biaya survei. Lek nggawe survei dewe sak Jawa Timur, regone Rp 300 juta–Rp 400 juta.

Tapi, biasane pasangan calon nggawe lembaga survei sing wis iso karo konsultasi. Mereka luwih pengalaman dan ngerti variabel opo ae sing arep diukur. Tur survei e yo gak pisan tok, biasane sampe ping telu–papat. Nah, nggo survei koyok ngono iku regone iso tembus miliaran.

Dadi, kanggo hajatan pilihan gubernur Jatim, sak enggak-enggak e, sak calon iku iso metu duit Rp 200 miliar–Rp 300 miliar. Dengan catatan, calone wis apik peluange. Artine, wis termasuk jago tur wis dadi nomer siji nang survei-survei.

Soro maneh lek calone durung apik popularitas karo elektabilitas e. Iso tembus Rp 500 miliar–Rp 600 miliar. Durung maneh lek pilkada e penuh ketegangan sampe telung putaran, iso tambah remuk sak e pasangan calon.

Lek nontok entek sakmunu akehe, sing ngatasi yo pasangan calon sing background e pengusaha. Tur pengusaha sing gueeedeee usahane. Soale, pengusaha level biase ae yo mesthi mikir tarung karo ngentekno duit sampe Rp 300 miliar. Opo maneh durung karuan menang. Sopo sing siap kelangan duit Rp 300 miliar?

Faktane, biasane calon iku dudu berasal seko kalangan pengusaha. Biasane seko kalangan politisi biasa. Tabungane yo akeh, tapi durung ngatasi kanggo tarung nang pilgub.

Gus Ipul iku sugeh, Khofifah yo iyo. Tapi, penulis durung yakin sak sugih-sugihe wong loro iku siap kelangan Rp 300 miliar. Mesthi bondo tarung pilgub gak seko duite dewe kabeh.

Terus duite seko ngendi? Sak eruh penulis, biasane seko urunan konco-koncone calon. Terutama pengusaha gede. Karo wong utowo pejabat-pejabat sing berharap calone iku menang.

Nah, lek wis ngene, opo iku gak dadi utang? Paling nggak, utang budi. Dadi utang jelas, tur akeh-akehe dadi utang budi. Soale, itung-itungane jelas gak mashok. Bayaran gubernur iku take home pay sekitar Rp 80 juta sak ulan. Dienggo mbayar utang Rp 200 miliar, yo jelas lunase iso-iso 20 tahun maneh.

Iki wis gak terhindarkan maneh. Gubernur endi ae mesthi duwe utang budi nang wong akeh. Utang budi sing gak mungkin iso disaur kabeh dengan pantes. Soale sumber daya sing diduweni yo terbatas.

Iku durung lek wis dadi gubernur, onok undangan macem-macem. Misale, undangan kawin. Gak mungkin gubernur teko nang kondangan terus bowone mek Rp 100 ribu–Rp 200 ribu koyok kowe-kowe iki. Durung neh ngurusi staf ahli. Bayaran resmi gubernur kadang yo kurang-kurang nggo operasional.

Lah berarti gak isok golek pemimpin resik lewat pilkada? Masio gambarane ketok surem, tetep isih ono peluang pemimpin apik lewat jalur pilkada langsung. Tapi, sebaliknya, yo ojok terlalu berharap onok pemimpin sing apike koyok wali-wali ngunu.

Buktine, isih onok pemimpin sing isok mbangun daerah masio kesandera banyak kepentingan. Misale, Bu Risma nang Suroboyo. Toh yo iso mbangun frontage road apik tur ombo.

Contoh liyane, Ahok sing nang Jakarta terus dilanjutno Anies Baswedan. Kabeh kuwi pemimpin sing tergolong apik. Maksude sing duwe konsep visi membangun.

Dadi, Rek, miliho pemimpin sing duwe visi iso mbangun. Sing masio kesandera utang budi akeh, program-programe diarahno nggo kepentingan rakyat. Lek onok siji–loro sing dienggo kepentingan ”balas budi”, sepanjang gak nemen-nemen dan gak tergolong korupsi, yo disadari.

Soale yok opo-yok opo, sistem e ancen nggarai seorang calon kudu duwe utang budi. Iki berlaku nang daerah endi ae nang dunyo sing nganut pilihan langsung.

Tapi, sing utama lek golek pemimpin, peno-peno kudu nyermati tenanan calon sing duwe keberpihakan nang rakyate. Wis terkenal gak e dudu jaminan. Ok, Rek?!