Dear, Mbak Nia yang cantik, pinter dan sholehah.

Kenalin, aye Rara, boleh Mbak panggil Maemunah kalo Mbak mau atau Markonah sekalian. Juleha juga gak ape-ape. Mane aje dah nyang Mbak senengin.

Begini, Mbak. Aye pingin nanggepin tulisannye nyang tentang banding-bandingin perempuan ntu.

Emang bener sejatinye tiap manusia ntu kagak boleh dibanding-bandingin, karena masing-masing punya kelebihan dan kekurangan. Meskipun mungkin kelebihan nyang mereka punya ntu kebanyakan kekurangan, dan kekurangan nyang mereka punya adalah gak punya kelebihan. Hehehe

Namun baek perempuan ataupun lakik pasti sebel kalo dibandingin. Apelagi kalo pas dibandingin die kalah sama pembandingnye. Tambah empet. Bukan ati aje nyang panas otak juga ngebul.

Tapi gak semua begitu loh, Mbak. Ade juga manusia yang demen dibanding-bandingin ame orang laen. Bawaannye kagak mau kalah ame orang. Aye sering ngalamin ndiri.

Ade temen aye nyang suka nanya: “Eh, gue ame die keliatannye gendutan siape sih? Kulitnye putihan mane? Mukanye segeran mane?” Aye mau jawab segeran liat empang daripada tuh tampang kagak berani! Kuatir diulek pake linggis.

Soal masakan, sering juga ade nyang komentar: “Menurut lu tumis kangkung gue ame die enaken mane?” Terus pertanyaan pembandingnye merembet ke rumah: “Enakan mane maen di rumah die ape rumah gw?” Abis itu merembet juga ke soal anak, ngebanding-bandingin prestasi anak lah, sekolahan ampe makanan favorit.

Lebih jauh ade juga nyang berani sok ngebandingin hubungan rumah tanggenye ame orang lain. Nah, soal nyang terakhir ini aye sempet ngamuk-ngamuk kemaren gegara ade sekumpulan lakik bilang kalo lakik nyang punye bini cuman atu tuh banci. Gak ganteng en gak gentle. Bukan lakik sejati. Beda ame mereka-mereka ini nyang berani poligami. Etdah!

Jadi terlepas dari Mbak suka atau kagak, ade orang nyang emang mencurahkan segenap daya dan upayanye untuk menang dari orang laen. Menganggap orang laen sebagai pesaing jadi harus terus menempatkan diri dan kehidupannye untuk selalu dibandingkan biar merasa “lebih”.

Mungkin bagi kite nyang liat nganggep orang begini gak bakal bahagia idupnye. Gak santaiii. Tapi bagi mereka bisa jadi ntu malahan passion-nye. Badan meriang, pikiran gatel dan ati berase hampa kalo gak ngulik-ngulik ape nyang bisa bikin orang lain ngebanding-bandingin dirinye dengan nyang laen lantas nganggep die nyang menang. Nyang “ter-” deh pokoknye.

Nah, keinginan ini bagai gayung bersambut dengan orang nyang emang hobi nyinyirin orang lain. Sehari gak nyinyir mulut berase “ditabokin cina” (sorry, bukan rasis, “tabokin cina” tuh istilah Betawi buat orang nyang ngerasa dalem mulutnye asem karena belon ngunyah ape-ape).

Jadi bersimbiosis mutualisme lah kedua jenis makhluk ini.

Nah, masalah Sherly ame Tsamara, aye punya penilaian sendiri. Kan Mbaknye komplen kenape tuh jilbabnye Sherly kok dijadiin penekanan seolah mengglorifikasi perempuan hijab berprestasi. Kalo nyang aye lihat seh, hal ini gak lepas dari kelakuan orang (or netizen) nyang suka meneiskreditkan dan underestimate terhadap perempuan berhijab.

Sebagai anak ’90-an, aye inget banget dulu ade sinetron nyang judulnye “Sholeha”. Ntu kalo nonton aye suka pingin garuk-garuk tanah. Si Sholeha diperanin ama Titi Kamal.

Digambarin sebagai muslimah nyang amat sabar sampe-sampe dijahatin kayak gimane cuman bisa diem, nangis, terus istighfar dan kembali tersenyum. Digamparin die gak bales, dibuka hijabnye depan umum kagak ngelawan, diboongin suami die pura-pura bego, dijahatin mantan madu die ngalah sampe dijadiin penari perut die manut.

Kalo diliat ampe sekarang, sinetron-sinetron bergenre hidayah juga ngegambarin perempuan berhijab begitu. Lemah, sabar, kalem, manut dan penurut meski dianiaya. Tapi ending-nye pasti menang, apapun jalan ceritanye.

Jadi sedikit banyaknye ini juga mempengaruhi pandangan orang-orang tertentu terhadap perempuan berhijab. Dan akhirnye terimplementasi ke kehidupan nyata.

Bukan sekali dua kali aye ngeliat orang ngeremehin perempuan berhijab. Dianggep makhluk lemah dan gak berani ngelawan. Apelagi kalo berhadapan dengan kaum Adam.

Dulu pernah aye berantem ame dosen S2 kampus Trisakti. Die gak gubris omongan aye nyang kagak ngijinin die nyuri absen pas pelatihan. Dateng pelatihan bolong-bolong, tapi absen mau full. Aye ingetin bekali-kali malah die liatin aye dari atas ke bawah terus ketawa ngeremehin.

Akhirnye aye Tip-X in tuh semua tanda tangan presensi palsunye depan muka die. Die bentak-bentak aye seolah aye pembantunye. Die nunjuk muka aye dan bilang jadi perempuan jangan sok belaguk. Aye bilang: “Loh ini kantor saya, Bapak yang seharusnya jangan belaguk di sini. Kalau saya mau, saya bisa kembalikan uang Bapak sekarang juga. Silakan cari tempat pelatihan lain”.

Terus die ketawa keras nantangin aye, akhirnye pas beneran aye kembaliin uangnye, die minta maap. Peserta nyang laen pun pade nyamperin aye.

“Mbaknya biasa kalem en sabar kok bisa galak juga yaaa… Udahlah, Mbak. Maapin aje. Kasian. Bisa kena blacklist di pusat tuh dosen.”

Ya bodoamatttt, aye kate.

Nah, underestimate macam gini sering dialamin ukhti-ukhti, Mbak. Ade nyang dianggep puritan dan fundamentalis sehingga dianggep gak pantes jadi pembicara di forum profesional. Ade nyang dianggep gak sigap kerjanye karena pake jilbab lebar dan jalannye pelan. Ini nyata, Mbak. Aye denger sendiri dari korban dan pelaku.

Aye pernah bawa orang keliling sekolah alam. Terus tuh orang bilang: “Nih kok guru-gurunye tampangnye pade kalem dan lemah gemulai ginih, ape iye bisa ngajarin anak berkegiatan di alam bebas?”

Rata-rata nyang begini pade bengong-bengong pas liat sesi pelajaran low and high impact outbound. Ntu nyang tadinye die bilang kalem dan gemulai bisa one step rapelling dari ketinggian 10 meter lebih.

Lebih lanjut, hal ini juga diperparah dengan isi kajian-kajian ekstrem kewanitaan nyang selalu ngajarin perempuan buat jadi pribadi nyang lembut, kalem, dan taat. Gak boleh ngomong kenceng karena suaranye aurat, gak boleh ngebantah kalo dibilangin suami, gak boleh pergi jauh-jauh kalo gak didampingin mahram.

Bener sih. Tapi coba tengok grup-grup poligami. Sebagian oknum lakik bermulut kalong wewe malah jadiin risalah ini buat merajam perempuan nyang mereka anggap sengak. Protes dikit, hajarrr. Beda pendapat langsung dicap kufur.

Merasa lebih tinggi kedudukannye sehingga bebas bikin dauroh dengan judul: Modal 5 juta, bisa dapet 4 istri. Terus gambar posternye perempuan-perempuan berhijab. Madikipe gak tuh!!!

Jadi di tengah penghujatan dan penghakiman terhadap perempuan berhijab nyang dianggep lemah, kalem, sabar, manut bahkan gak bisa mikir panjang, keberadaan perempuan berhijab berprestasi nyang muncul ke publik itu bagaikan obat penyegar, Mbak.

Nyang perempuan ngerasa haru dan bangga karena akhirnya ade figur nyang mewakili suara mereka. Sebagai role model nyang membuktikan bahwa perempuan berhijab itu juga bisa keren kalo die mau. Bisa hebat kalo lagi berdebat. Bikin membara jika mau dan diijinin bersuara.

Laki-laki waras nyang gak geli sama perubahan dan kemajuan jaman juga pastinye seneng dengan kemunculan Sherly, Kalis, Esty, Nia, Asri, Mimi, Yana, Erin de el el. Selaen enak dilihat pastinye juga enak diajak ngobrol. Gak iya-iya, hoya-hayuks aja.

Loh mangnya perempuan berhijab ade nyang super penurut dan gak berani ngomong, Mpok? Banyaaaakkkkkk, woii, banyakkkk.

Mereka begitu bukan berarti mereka bodoh. Tapi karena terbentur dengan situasi dan kondisi nyang melingkupi kehidupan mereka dan kagak bisa lepas dari kungkungan benturan tersebut.

Kenape gak bisa lepas? Sebagian takut, sebagian lagi karena lagi melindungi sesuatu dan sebagian lagi banyak nyang berharap dapet pembalasan akhir nyang jauh lebih baek. Pedih dah kalo dicritain.

Jadi menurut aye, ye biarin ajeh deh kalo ade orang-orang nyang heboh dengan kemunculan perempuan berhijab nyang cakep, berprestasi, dan berani ngomong. Syukur-syukur jadi viral terus kebaca saudari-saudarinye nyang lagi gak kuasa menyuarakan bahasa perlawanan. Biar nambahin semangat. Ngilangin galau biar berani melangkah keluar dari kungkungan nyang bikin die sengsara.

Kalaupun ujung-ujungnye jadi pade ngebanding-bandingin ame Tsamara, ya mungkin emang nasib si Tsamara-nye aje nyang lagi apes.

Selaen karena beda kubu dan pandangan politik ame si Sherly, akhir-akhir ini si eneng Tsamara kayaknye emang lagi diuji. Udeh kemaren dapet perolehan suara gede banget pas pileg, tapi gagal dapet kursi aleg gegara partainye gak lolos ambang batas parlemen. Eh, sekarang cuitan lamanye dikulik-kulik orang.

Jadi bikin geger karena berlawanan dengan sikap politik partainye. Jadinye die apus deh tuh cuitan nyang udeh diskrinsyut orang banyak. Diledekin bareng-bareng deh….

Neng, nengggg. Nyang sabar ye, Neng!