SUROBOYO ulang tahun rek dino iki. Sebagai warga Suroboyo, yok opo lur menurutmu? Opo Suroboyo wis ketoto apik? Opone sing kurang? Sing jelas, ulang taune kuto bedho mbek ulang taune wong. Gak isok dikon nraktir mangan-mangan. Halah…ngomong opo seh…jayus maneh.

Sakdurunge mbahas iku, ayo dibahas disik sejarahe. Sakdurunge tanggal 31 Mei, jan-jane ulang tahun Suroboyo iku tanggal 1 April. Lho kok iso? Iyo, mergone njupuk seko pertama kaline administrasi Kuto Suroboyo dibentuk karo pemerintah Londo. Tanggal bulan taune iku 1 April 1906. Londo resmi netapno Suroboyo sebagai Zelfstaandige Stadsgemeente atau kotapraja dengan hak otonom.

Tapi, pas akhir 1974, onok wong sing marani wali kota Suroboyo saat iku, R. Soekardjo. Dek e ngomong lek gak usah manut dasar pemerintahan Londo. Soale Suroboyo wis onok suwe, ket zaman sakdurunge Mojopahit malah. Diskusi, diskusi, diskusi, akhire Pak R. Soekardjo netapno tanggal 31 Mei sebagai kelahiran Suroboyo.

Pedomane, pas iku Raden Wijaya ngalahno tentara Tartar kongkonane Kubilai Khan nang Ujung Galuh, jeneng lawase Suroboyo. Resmine, tahun iki Suroboyo ulang taun ke-725. Wuihh…wis tuwek nemen rekkk…

*

Wis cukup mbahas sejarahe Suroboyo, Rek. Sing penting pas ulang taun iki pertanyaane, opo Kuto Suroboyo wis apik? Jenis pertanyaan nggapleki. Soale pertanyaan sederhana, tapi jawabane mesthi bedo-bedo lur. Atek angel sisan.

Suroboyo, koyok lumrahe kuto gedhe liyane, sangat kompleks. Gak gampang didefinisino. Arep nilai seko apane coba? PDRB, koefisien gini, kualitas hidup, arah pemerintahan, wuihh…iku bener lur. Tapi nggarai ngelu nang ndas mocone.

Masio ngunu, Suroboyo tetep iso dirasakno. Contohne aku dewe. Aku wis mlaku-mlaku nang akeh kuto nang Indonesia. Wis ngerasakno denyute kuto-kuto liyane. Tapi jujur ae, gak onok sing iso nggawe aku kerasan ketimbang Suroboyo. Iki gak ngecap lho, rek. Aku ketemu akeh konco-koncoku dan kabeh setuju. Suroboyo iku kuto sing semakin mrene semakin apik, rek. Dibandingno Jakarta, misale.

Memang, fasilitas, kue ekonomi, lan puterane duik akeh nang Jakarta. Tapi, aku luwih iso ngerasakno urip nang Suroboyo. Macete Jakarta iku lho lurrr, gak nguati. Lek sampeyan janjian karo wong jam 09.00, iku berarti jam 06.00 wis kudu budhal. Bedo karo nang Suroboyo. Sampeyan janjian jam 09.00, jam 08.30 budal ae kadang isih ndisiki jadwal.

Terus atsmosfer kutone, suegerrr lur. Sampeyan coba lewati Jalan Darmo utowo Jalan Walikota Mustajab. Wit-witane rindang masio iku jalan utama. Sampeyan bandingno karo Bandung sing jarene kuto kembang. Gak nok apa-apane karo Suroboyo. Iki aku main data lho, lur. Total ono 324 taman nang Suroboyo. Iyo, gak salah moco. Telung atus empat likur taman.

Rinciane, 270 taman penghijauan (koyok nang tengah Jalan Darmo) lan sisane 54 taman kuto sing iso digawe dolanan. Saiki sopo sing gak seneng nang Bungkul? Opo nang taman prestasi? Wis ngunu kadang tamane iku sek ditambahi fasilitas nggo futsal. Opo gak sangar a lur ngunu iku?

Selain iku, wong Suroboyo iku nyenengno, blak-blakan, tur apikan. Sing paling penting, wong Suroboyo iso digawe maju. Gak percoyo? Coba takono polisi-polisi sing tau dines nang Suroboyo. Koyo to, Kakorlantas Irjen Pol Royke Lumowa, Penmas Brigjen M. Iqbal, karo mantan Kepala BNN Komjen Pol (Purn) Anang Iskandar.

Mereka roto-roto seneng karo wong Suroboyo. Iso dirangkul, dijak tertib, karo dijak maju. Buktine, akeh inovasi UU Lalu Lintas sing asale seko eksperimen nang Suroboyo. Koyok ngurupno lampu, kanalisasi, klik helm, tilang online, akehh rekk. Mereka ngakoni, peraturan iku gak akan iso berhasil lek ancen arek-arek Suroboyo gak iso dijak maju. Roto-roto, polisi nang Suroboyo sing melakukan inovasi pasti duwe cerito apik soal Suroboyo. Iso dibandingno lalu lintas nang Suroboyo karo kuto-kuto liyane. Tertibe adoh, lur…

Iku sek sebagian kecil kehebatane Suroboyo. Durung maneh lek kene ngomong duwe wali kota sing visi pembangunane mashoookk, frontage road sing uommboooo, karo terobosan layanan masyarakat laine.

Durung maneh kene ngomong soal kuliner, lur. Paling cetho iku sego bebek. Nang daerah liyo, lek pingin mangan bebek enak, sampeyan kudu golek muter sek. Paling gak golek rekomendasi. Tapi nang Suroboyo, kabeh sego bebek e iku enak. Wis empuk-empuk. Nang daerah liyo, salah pilih golek sego bebek, kiamat lur! Wis ambune plengus, daginge yo sering ngejak gelut gara-gara saking alot e. Durung sop buntute, durung rujak cingur sing awan-awan dipangan karo ngombe es blewah. Mashookk….Suroboyo iki ancene salah satu kerajaan kuliner nang Indonesia, lur.

Yo jane isih akeh kekurangane sebagai kuto. Misale, sek akeh warga sing mlarat. Kadang yo ono wargane sing mbletat melok ISIS, koyok keluargane Dita Oepriarto iku. Gak onok gawene ngebom ngejak anak bojone. Wis, wis, gak genah. Tapi, yok opo-yok opo, iki kutho sing tak cintai, lurrr. Masio ngrantau nang ndi-ndi, rasane pengen urip karo matek nang kuto iki.